Goal: მემფის დეპაი "ბარსელონას" შესახებ საუბრობს
ჰოლანდიის ეროვნული ნაკრებისა და საფეხბურთო კლუბ "ლიონის" თავდამსხმელმა მემფის დეპაიმ, კომენტარი გააკეთა "ბარსელონას" ინტერესზე. შეგახსენებთ, პრესაში გავრცელებული ცნობების თანახმად, ფეხბურთელის გაფორმებით პირადად არის დაინტერესებული კატალონიელთა ახალი მთავარი მწვრთნელი - რონალდ კუმანი.”ჩემი აგენტისგან ბევრი არაფერი მსმენია. ვიცი, რომ მსგავსი ინტერესი არსებობს, მაგრამ სათქმელი არაფერი მაქვს, რადგან ცოტა რამ ვიცი ამის შესახებ”- ციტირებს მემფის დეპაის სიტყვებს გამოცემა Goal-ი.
ზემოხსენებულმა თავდამსხმელმა "ლიონთან" კონტრაქტი 2017 წელს გააფორმა. მისი მოქმედების ვადა 2020/2021 წლის სეზონის ბოლოს იწურება. ინტერნეტ-პორტალი Transfermarkt0ი ფეხბურთელს 44 მილიონ ევროდ აფასებს. კატალონიის "ბარსელონას" გარდა, მემფისით დაინტერესებულია იტალიური "მილანიც".
საფრანგეთის ჩემპიონატის 2019/2020 წლების სეზონში, რომელიც პანდემიის გამო ვადაზე ადრე დასრულდა, დეპაიმ 13 მატჩი ჩაატარა და 9 გოლი გაიტანა. წარმატებული აღმოჩნდა მისი ასპარეზობა უეფას ჩემპიონთა ლიგის ტურნირზეც. "ლიონმა" ნახევარფინალურ სტადიამდე მისვლა შეძლო. ამ გუნდმა ასპარეზობას გამოთიშა ტურინის "იუვენტუსი" და მანჩესტერ "სიტი".