ფაბრიციო რომანო: "აიაქსი" მანჩესტერ "იუნაიტედის" წინადადებას დათანხმდა

ფაბრიციო რომანო: "აიაქსი" მანჩესტერ  "იუნაიტედის" წინადადებას დათანხმდა ამსტერდამის "აიაქსის" ნახევარმცველი დონი ვან დე ბეკი, ამიერიდან მანჩესტერ "იუნაიტედის" ღირსებას დაიცავს. ამის შესახებ ინფორმაციას, ცნობილი იტალიელი ჟურნალისტი ფაბრიციო რომანო, "ტვიტერის" საკუთარ გვერდზე ავრცელებს.

"აიაქსმა" ყოველგვარი პრეტენზიების გარეშე მიიღო "წითელი ეშმაკების" სატრანსფერო წინადადება, რომელიც მოცულობით - 40 მილიონი ევროს ტოლფასი იყო. ხელშეკრულება ასევე ითვალისწინებს ეგრედ წოდებულ ბონუს სისტემასაც.


უახლოეს დღეებში ფეხბურთელი ინგლისში გაემგზავრება, სადაც სამედიცინო შემოწმებას გაივლის და ხსენებული ტრანსფერიც ოფიციალურად დადასტურდება. ფეხბურთელის ხელში ჩაგდება სურდა კატალონიის "ბარსელონასაც". მისით უშუალოდ იყო დაინტერესებული კატალონიელთა ახალი მთავარი მწვრთნელი - რონალდ კუმანი.

23 წლის ვან დე ბეკი, ამსტერდამის "აიაქსის" აღზრდილი ფეხბურთელია. გასულ სეზონში მან ჰოლანდიის ჩემპიონატის 23 შეხვედრაში მიიღო მონაწილეობა. გამოირჩა 8 გატანილი გოლით და განახორციელა 6 შედეგიანი გადაცემა. მთლიანობაში ფეხბურთელმა 3 ყვითელი ბარათი მიიღო. რაც შეეხება მოქმედ კონტრაქტს, იგი 2022 წლამდეა გათვალისწინებული.

» წყარო

ინფორმაცია ჩვენს საიტზე კომენტარების დაწერა შესაძლებელია მხოლოდ სიახლის გამოქვეყნებიდან 45 დღის განმავლობაში.