The Telegraph: სანჩო "იუნაიტედში" გადასვლას არ ჩქარობს
დორტმუნდის "ბორუსიას" ნახევარმცველი ჯეიდონ სანჩო მზად არის, გერმანიაში კიდევ ერთი წლით დარჩეს. ამის შესახებ ინფორმაციას გამოცემა The Telegraph ავრცელებს. წყაროს მტკიცებით, ფეხბურთელმა უკვე ამცნო საკუთარ თანაგუნდელებს, რომ მანჩესტერ "იუნაიტედში" გადასვლის ფორსირებას არ მოახდენს იმ შემთხვევაში, თუ ხსენებულმა გუნდებმა სატრანსფერო თანხაზე შეთანხმებას ვერ მიაღწიეს.სანჩოს სურს მანჩესტერულ გრანდში ასპარეზობა, მაგრამ მოვლენებს არ დააჩქარებს. აქედან გამომდინარე დორტმუნდში ფიქრობენ, რომ ხსენებული ფეხბურთელი მათ რიგებში მინიმუმ ერთი სეზონით კიდევ დარჩება.
გასულ სეზონში 20 წლის შემტევს საოცარი სტატისტიკური მაჩვენებელი ჰქონდა. სანჩომ გერმანიის ჩემპიონატის 32 შეხვედრაში მიიღო მონაწილეობა, გამოირჩა 17 გატანილი გოლით და 16 შედეგიანი გადაცემით. ხსენებული ფეხბურთელი მანჩესტერ "იუნაიტედის" მთავარი სატრანსფერო სამიზნეა.