ვერატი : ეს იქნება ყველაზე მნიშვნელოვანი 90 წუთი ამ კლუბის ისტორიაში
"პარი სენ-ჟერმენის" ნახევარმცველი მარკო ვერატი, ინტერნეტ-გამოცემა Goal-თან მიცემულ ინტერვიუში, საკუთარი ფიზიკური კონდიციების შესახებ საუბრობს. მისი განცხადებით, ტრავმა უკვე მოიშუშა და მზად არის მიუნხნის "ბაიერნის" წინააღმდეგ იასპარეზოს."უეფას ჩემპიონთა ლიგაზე თამაში, მარტივი საქმე არასდროს არ არის. წინ მხოლოდ 90 წუთია დარჩენილი. ეს არის ყველაზე მნიშვნელოვანი 90 წუთი - ამ კლუბის ისტორიაში. აუცილებელია მზად ვიყოთ. მოცემულ მომენტში თავს უკეთ ვგრძნობ და სულ უფრო ხშირად ვარჯიშობ გუნდთან ერთად. საერთო ჯგუფთან ერთად ბოლო 2-3 დღეა რაც ვმუშაობ და ყველაფერს გავაკეთებ იმისათვის, რომ ფინალისთვის მზად ვიყო. მოედანზე გასვლა ნახევარფინალშიც შემეძლო. საბოლოო არჩევანი, რა თქმა უნდა, მთავარი მწვრთნელის პრეროგატივაა."-აღნიშნავდა მარკო ვერატი.
შეგახსენებთ, 27 წლის ფეხბურთელს კუნთების პრობლემა აღენიშნებოდა. მან ხსენებული დაზიანება ვარჯიშის დროს მიიღო, როდესაც საკუთარ თანაგუნდელს შეეჯახა.